المشروعات البحثية لكل مادة دراسية مرتبطة بمنهج الفصل الدراسي الثاني ( الصف الثالث الإبتدائي حتى الصف الثاني الإعدادي )

السلام عليكم ورحمة الله وبركاته 

الموضوع اللي هنتكلم فيه إنهارده عن الطلاب اللي فرحانه أن الترم الثاني إتلغى ومقضينها أجازات ، أحب أبشركم أنكم هتذاكروا الترم الثاني كامل في كل المواد وملزم بعمل بحث عن كل مادة على حدة 

نقول تاني 

الترم ماتلغاش ... الترم ماتلغاش .... الترم ماتلغاش
كل ده زي كل دول العالم ما بتعمل مع الأزمات الكبيرة زي فيروس كرونا 

هو الموضوع كله إن مفيش امتحانات بس وهاتقدم بحث مشروع لكل ماده بعد اما تدرس كل ماده للاخر ومحدش يسال يعني ايه بحث مشروع لان المدرسين ذات نفسهم لسه مش عارفين حاجه 😂

بقول تاني الترم ماتلغاش هو الموضوع كله انك تخلص المنهج في الدروس بعد الاجازه واقعد وماتذاكرش زي الاول بضمير ذاكر عادي عشان البحث

نقول تاني ... الترم ماتلغاش
يارب نفهم

نبدأ بقى التفاصيل مع بعض واحدة واحدة 

نظرا للظروف الصعبة التي تمر بها بلادنا وكل دول العالم بسبب فيروس كرونا أو المسمى COVID - 19  قام وزير التربية والتعليم بإلغاء إمتحانات الترم الثاني فقط ولم يقم بإلغاء الترم الثاني كما هو متداول على صفحات التواصل الإجتماعي فيسبوك وغيرها ، فقام الوزير بعمل خطه جديدة تعتمد على المذاكرة في المنزل وذلك نظرا لسلامة الطلاب والمدرسين القائمين على العملية التعليمية وإستبدال الإمتحانات بمشروع بحثي عن كل مادة على حدة وذلك عن طريق الإنترنت ، بالإضافة إنه عمل موقع للتواصل بين الطلاب والمدرسين والموجهين من جهه ، ومن جهة آخرى عمل صفحة على موقع بنك المعرفة المصري للمذاكرة إلكترونيا للطلاب وهذه المواقع هي :

الموقع الأول هو للتواصل بين الطلاب والمدرسين المشرفين على ابحاث الطلاب وهو ::  www.edmodo.org 
وده موقع يحتاج إلى التسجيل سواء معلم أو طالب أو ولي أمر 

الموقع الثاني هو للمذاكرة إلكترونيا لكل مادة تحتاج عمل بحث لها وهو :: Study.ekb.eg 
وده موقع تابع لبنك المعرفة المصري الذي يستخدمه الطلاب خصوصا في المرحلة الثانوية 

ودي أول صورة من الموقع نفسه تثبت الكلام اللي انا كاتبه فوق ده 

أبحاث الطلاب في المرحلة الإعدادية والإبتدائية

وده يأكد تماما عدم إلغاء الترم الثاني نهائيا وإستبدال الإمتحانات بأيحاث يقوم بها الطلاب عن كل مادة ، وكذلك لم يتم إلغاء أي وحدة من المنهج .

أما بالنسبة للأبحاث اللي هيه المشاريع كما هو متداول فهو على كلام الوزير أنه هيتم تحديده بالتفصيل خلال أسبوع من الإعلان عن  هذا الأمر ، فالطالب مش عارف حاجة لسه ولا المدرس لسه عارف التفاصيل اللي هيمشي عليها لمعرفة إزاي هيساعد الطلاب في إتمام الأبحاث والتواصل مع الموجهين لرفع هذه الأبحاث على الموقع المخصص لذلك . ودي صورة بتأكد الكلام ده :

قرار وزير التربية والتعليم - مصر - أبحاث الطلاب في المرحلة الإعدادية والإبتدائية

لحد دلوقتي إحنا منتظرين أخر التعليمات من وزير التربية والتعليم المصرية ، للبدء في عمل الخطه والأبحاث للطلاب ومساعدتهم قدر المستطاع علشان يعدوا السنه دي على خير .

بالإضافة إني هضيف ليكم خطاب رسمي من الوزارة ورئيس مجلس الوزراء بيشرح فيه التفاصيل لكل ده وهو عبارة عن ورقتين هحطهم تحت بعض الرجاء قرائتهم بعناية :

ودي هيه الورقة الأولي من الخطاب الورقة الثانية :

وفي أخر الموضوع ده أحب أقول كلمتين مهمين عن الوضع الصعب اللي بنمر بيه :

1. مش معني أنك واخد أجازة أنك تقضيها خروجات وفسح ولمه أصحاب والحاجات اللي كلنا كنا بنعملها دي وأفتكر كويس أنت واخد أجازة ليه ، فحاول قدر المستطاع تفكر في أهلك ( والدك - والدتك - أخواتك - قرايبك ) حاول متنشرش العدوى ليهم من دخولك وخروجك من البيت لأن ده السبب الرئيسي لإنتشار العدوى ، مش هتقدر تستحمل تعيش وهما تعبانين ، نسأل الله السلامه للجميع .

2. نسأل الله أن يرفع عنا البلاء والوباء عن بلادنا وكل بلاد المسلمين ، معتقدش أن فيه أكبر من الصلاة تتمنع من المساجد والكنائس ، فنسأل الله العافية لنا ولكل أمهاتنا وأبائنا 

3. إلتزم بالتعليمات الصادرة من المصادر الرسمية فقط ومنظمة الصحة العالمية ومتسمعش أي كلام في أي فيديو لأن معظم المعلومات اللي فيها خصوصا التعقيم والمواد المستخدمة معظمها معلومات خطأ ، ناس بتلم مشاهدات وخلاص على أساس غير علمي ممكن لا قدر الله تجيب نتيجة عكسية غير متوقعه .

ربنا أرفع عنا البلاء وأرحمنا فأنت بنا راحم ، ولا تؤاخذنا إن نسينا أو أخطأنا ، ولا تحملنا ما لا طاقة لنا به 

أ / أحمد سليمان 

***********************

***********************